Mae’r Coleg Merthyr Tudful yn hynod falch o dderbyn statws Uned Hybu Ysgolion Arddangos Microsoft yn gydnabyddiaeth o’i ymrwymiad cyfredol i arloesi blaenllaw mewn datblygiad proffesiynol.
Mae’r statws Uned Hybu, sydd ond y cam cyntaf yn nhaith drawsnewidiol y coleg tuag at gael statws lawn Ysgol Arddangos Microsoft erbyn 2023, yn atgyfnerthu gweledigaeth y coleg i wthio ymlaen arweinyddiaeth, dysgu, technoleg a seilwaith digidol sy’n ysbrydoli a rhoi grym i staff ddatblygu eu gallu a’u harbenigedd mewn dysgu digidol.
Bydd hyn yn ei dro yn help i sicrhau y bydd y coleg yn cynnig yr addysgu, dysgu a chymorth gorau i ddysgwyr, gan ddefnyddio’r technolegau dysgu ac addysgu diweddaraf un i sicrhau fod pob dysgwr yn ‘barod am y dyfodol’.
Meddai Gareth Morgan, Cydgysylltydd Digidol “Mae’r coleg yn teimlo’n gyffrous iawn ein bod wedi derbyn statws Uned Hybu Ysgolion Arddangos Microsoft. Rydym wedi ymrwymo i ddatblygu galluoedd a sgiliau’r staff i gyd, rhywbeth sy’n amlwg o’r niferoedd uchel o staff sydd eisoes wedi derbyn statws Ardystiedig Microsoft a statws Arbenigwr Addysgwr Arloesol Microsoft. Mae hyn oll yn cynnig sylfaen gadarn i ni nawr i adeiladu arni wrth i ni symud ymlaen ar ein taith i gael Statws Ysgol Arddangos Microsoft.”
Meddai Chris Ford, Cyfarwyddwr Dysgu yn y coleg “Mae addysg wedi trawsnewid llawer cynt na ragwelwyd oherwydd pandemig coronafeirws ac mae cael y statws hwn yn amlygu’r gwaith caled a gyflawnwyd gan y coleg nid yn unig i gryfhau strategaethau a seilwaith digidol y coleg ond i wirioneddol wthio arloesi ymlaen mewn dysgu digidol.
Dros y ddwy flynedd ddiwethaf rydym wedi gwneud cynnydd mawr wrth symud yr holl ddysgwyr a staff i Microsoft Office a defnyddio Microsoft Teams fel platfform effeithiol ar gyfer dysgu o bell, cyfunol gwell. Rydym yn llawn cyffro nawr i gael y cyfle i weithio gyda’r Rhaglen Ysgol Arddangos i ddatblygu’r platfformau hyn ymhellach, dysgu gan, a rhannu, arferion da ac arloesi technolegau ac adnoddau digidol newydd i sicrhau’r profiad dysgu gorau i bawb.”